Nadat Andriëtte Norman in 2007 as naaswenner in die Suid-Afrikaanse TV-sangkompetisie Idols geeïndig het, het haar debuutalbum, Diamant, in 2008 die rakke getref. Haar nuutste enkelsnit, Mis jou Meer, is pas deur Coleske Artists Management vrygestel.
Dié Kapenaar, gebore en getoë in Brackenfell, is daarna baie tuis op groot verhoë waaronder die Huisgenoot Skouspel-verhoog en vertolk treffers spesiaal vir haar gekomponeer deur Steve Hofmeyr en Rudi Claase.
Andriëtte het na skool eers haarself in die skoonheidsbedryf bekwaam en was self ook al eienaar van ’n klerewinkel. Sy is ook ’n geleentheidsbestuurder en beoefen deesdae voedselkunde as ’n stokperdjie. Sy beskryf haarself as humoristies. “Ek hou daarvan om mense te laat lag, maar ek kan ook baie ernstig en diep wees. Oor die algemeen is daar maar altyd ’n glimlag op my gesig en ek hou van met mense gesels,” het sy vertel.
Luister gerus na Andriëtte Norman op alle musiekstromingsdienste.
