Жағдай өте қиын! Батыс Қазақстан облысында тасқын қаупі сағат сайын күшейіп барады

Батыс Қазақстан облысында тасқын қаупі сағат сайын күшейіп барады. Өңірдің Шыңғырлау, Бөрлі, Бәйтерек аудандарында жағдай тіптен ушығып, төтенше жағдай жарияланды. Ондағы 50-ге жуық үй су астында қалып, 200-ден астам адам қауіпсіз жерге көшірілген. Тіпті кейбір тұрғындарды су басқан ауылдардан тікұшақпен алып шығуға тура келген. Ал құтқарушылар сай-саладан аққан сумен алысып, көшедегі суды сорғызып үлгере алмай жатыр. Ал өзен-көлдердің мұзы толық ерімегендіктен, су деңгейі тағы да өсуі мүмкін екен. Мамандар әсіресе Жайық өзенінен келер қауіп орасан деп қорқып отыр. Сондықтан, іргелес Атырау және Маңғыстау облыстарынан құтқарушыларды көмекке шақырған. Әріптесім Диана Сапарқызы су басқан аймақтағы ахуалды айтып берсін.
Еріген қар суының тасуынан қазір өңірдегі 14 елдімекенмен қатынас тоқтаған. Солардың бірі Аққозы ауылы. Ондағы жұрт осылай табан асты көлкіген судың ортасында қаламыз деп ойламаған. Тек қажетті заттарын ғана тез жинап, қауіпсіз жерге қашқан. Ал кейбір тұрғындар қорадағы ұсақ малдарын сыйғанынша тракторға тиеп, ауыл сыртына шығарып үлгерген екен.
Ақбұлақ ауылында да жағдай мәз емес. Сай-саладан аққан қар суы ауыл маңындағы бөгетті толтырып тастаған. Сағат сайын өскен су тасып, үйлерді басып қалған. Қайта құтқарушылар көмекке келіп, ауыл халқын эвакуациялап үлгеріпті. Қазір тұрғындар туыстарының үйлерін паналап жатыр.
Ал, Қоржын елдімекенінде көліктердің қозғалысы тіптен қиындаған. Су ортасында қалған тұрғындарды құтқарушылар тікұшақпен қауіпсіз жерге тасымалдаған. Жедел қызметтің мәліметі бойынша, аймақта қауіп күшейіп барады. Өйткені, бірер күнде өзен-көлдердің мұзы тағы ерісе, су деңгейі әлі де көп келуі мүмкін. Сөйтіп, тағы алты ауданда тасқын болу қаупі бар деп отыр.
ЮРИЙ ИЛЬИН, ҚР Төтенше жағдайлар министрі:
- Жағдайды бақылап отырмыз. Байланыссыз қалған Қоржын ауылының тұрғындарын тікұшақпен тасыдық. Жалпы облыс бойынша 240-тан астам тұрғын эвакуацияланды. Қазір Батыс Қазақстан және Ақтөбе облыстарын қатты бақылауға алдық.
Ал облыс әкімі Нариман Төреғалиевтің айтуынша, қар суынан бөлек, өзендер тасып жағдайды одан бетер ушықтырып жіберген. Облыста 45 өзен бар. Әсіресе қалаға жақын Деркөл, Шаған өзенінен су көтеріліп, маңайға тарап жатыр. Дегенмен, алдағы ең үлкен қауіп Жайық өзенінен күтіліп отыр дейді.
НАРИМАН ТӨРЕҒАЛИЕВ, Батыс Қазақстан облысының әкімі:
- Қазір жағдай қиындады. Ашық айтуымыз керек. Биыл қар аз түсті соған қарамастан судың көлемі көбейді. Біздегі ең қауіп мынау Саратов облысынан мынау Оренбург облысына қазір бізге су келу жөнінде хабарлама келді. Біз Ресей әріптестерімізбен сөйлесіп отырмыз. Қазір бізге ең қауіпті мәселе ол Жайық өзенінен келетін. Қазір бізге жалпы беріліп отырған алдын ала мәлімет бойынша 7-8 метрге дейін Жайық өзені көтерілу қаупі бар.
Қазір облыстың 1200 құтқарушысы мен 400-ге жуық техникасы тасқынмен күреске жұмылдырылған. Бірақ, бұл күш ауыл-аймақтарға жетпей жатыр. Сондықтан Атырау және Маңғыстау облысының құтқарушылары көмекке келген.
Бізді әлеуметтік желіде оқыңыздар:
KZhead - / @informburo31kanal
Facebook - / informburo31
Instagram - / informburo31
Vkontakte - vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал