Бұдан кейін Месси Алтын допқа лайық па? ПСЖ-ны МБАППЕ қалай ЖАЛҒЫЗ құтқармақ? #66

Бұл - Соққы және гол! #66. Қонақта Мағжан Мырзағали
SOQQY - промокоды арқылы бонусқа ие болыңыз
Телеграмда күнде жаңалықтар шығып тұрады: t.me/soqqyjanegoal
Бізді іздесеңіздер:
/ alimjanasqar
/ tarazfifa
ПСЖ 0:1 Бавария
Матч алдындағы басты сұрақ Килиан Мбаппе мен Лионель Месси шыға ма деген болды. Кристоф Гальтье ертеректе негізгі жұлдыздарға иек арта алмайтынын айтып налыған. Жеме-жемге келгенде, жарақат алған футболшылар тізімге ілікті. Мбаппе қосалқы құрамда табылса, Месси бірінші минуттан бастап доп тепті. Мессидің қасында шабуылда Неймар ойнады, қапталда Уоррен Заир-Эмери мен Солер өнер көрсетті. Оң қапталдағы Заир-Эмери 2006 жылы дүниеге келген. 16 жастағы француз чемпиондар Лигасының тарихында плей-оффта негізгі құрамда шыққан ең жас футболшы атанды.
Бавария құрамында айтарлықтай өзгерістер болмады. Қақпаны командаға жақында қосылған Ян Зоммер қорғады. Ол осы УЕФА чемпиондар Лигасында көмектесуі керек командаға деп арнайы алынған. Себебі негізгі голкипер Мануэль Нойер Әлем чемпионатынан кейін демалыста шаңғы тебемін деп, жарақат алып қалды. Нәтижесінде Бавария болмайтын жерден негізгі қақпашысының көмегінен айырылып қалды. Осының алдында мюнхендіктер Нойерсіз қалғанда, ЧЛ-да масқара болған. Биыл сол қателікті қайталамауды ұйғарды. Зоммер бұрыннан топ-деңгейде ойнауға лайық-тұғын.
Негізгі құрамда Жоау Канселу шықты, ал Альфонсо Дэвис қосалқы құрамда қалды. Дегенмен сұлбада көрсетілгендей Канселу сол қапталда емес, оң қанатта ойнады. Павар үш орталық қорғаушының бірі болып, Канселуға жақын орналасты. Яғни Бавария 4-4-2 жүйесінде емес, 3 орталық қорғаушымен ойнады.
Шабуылға Эрик Максим Шупо Мотинг жауапты болды. Ол Баварияға дәл осы ПСЖ-дан ауысып келген. Бұрынғы командасына қарсы ойнады камерундық футболшы өте жылдам гол соғуға шақ қалған. Шупо-Мотинг алыстан қауіпті соққы жасады, бірақ есеп ашу бұйырмады. Ойындағы алғашқы голды бірінші таймда көре алмадық.
Жалпы ПСЖ мен Бавария соңғы кездері өте жиі ойнап жүр. Ақырғы алты маусымның төртеуінде жолдары түйіскен. Оның ішінде 2020 жылғы Лиссабондағы финал бар. Эштадиу де Бенфикада мюнхендіктер 1:0 есебімен жеңіске жетіп, қалқанқұлақ кубокты көкке көтерген. Негізі ПСЖ Баварияға қарсы бұған дейін 12 матчтың 6-нда ұтқан, дәл соншасында жеңілген - тең есеп тіркелген емес.
Кешегі Парк де Пренстегі бірінші таймда сол тең есептің кезі келгендей сезім пайда болды. Баварияның басымдығы байқалғанымен, ПСЖ жанкүйерлердің алдында ұятқа қалмауды мақсат етіп, 0:0 есебін сақтап тұрды. Соңғы кездері париждіктердің ойыны нашарлап кеткені рас. Ішкі чемпионатта мүлдем жеңілмейміз деп мақсат қойған Гальтье мырза соңғы 7 матчтың өзінде 3 рет тізе бүкті. Монако, Ренн және Ланс Париж үшін қиын қарсыласқа айналды. Оған қоса, ПСЖ Франция кубогында Ле-Классикте есе жіберіп, келесі кезеңге жолдаманы Марсельге қолдан берді. Месси тағы да Франция кубогын ұта алмады.
Баварияның да неміс Бундеслигадағы жағдайы мінсіз емес. Әлем чемпионатынан кейін рекордмайстер тең нәтижелерді көп тіркеп кетті. Айтрахт, Келн, РБ Лейпциг БайерНді ұпайдан қаққан.
Дегенмен тура ЧЛ алдында Юлиан Нагельсманның командасы қаһарына мінді - Бохум мен Вольфсбургты талқандап тастады. Ал Германия Кубогында Майнцты 4:0 есебімен ұшырып жіберді. Сөйтіп Парижге сақадай сай дайын келді.
Бавария чемпиондар Лигасының топтық кезеңін де мықты өткерген. Немістер алты ойынның алтауында да жеңіске жетті. Қарсыластары Интер мен Барселона сияқты алыптар болғанын сезбей де қалды. Ал плей-оффтың бірінші матчында ПСЖ-ны қиындықсыз қапы қалдырды.
Бірінші таймда Нагельсманның командасы қақпаға 9 соққы жасап, 2-уін дәл тигізді. ПСЖ болса, бір-ақ рет қақпаға қаратып тепті, оның өзі дәл соққы болмады. Париждіктер дәрменсіздік танытты. Бейнебір 8 жыл бұрынғы Барселона - ПСЖ матчын қайта көріп жатқанымыздай сезім туындады. Ол кезде Неймар, Месси және Суарес париждіктерді талқандап тастаған. Қазір ол үштіктің екі ойыншысы алаңға ПСЖ жейдесін киіп шықты.
Кристоф Гальтье бірінші таймнан кейін өзгерістер жасауға міндетті болған. Бірақ алғашқы жүрісті Нагельсман ұсынды. Үзілісте Юлиан Жоау Канселуды демалуға жіберді. Португалиялықтың орнына шыққан ұтқыр Альфонсо Дэвис гол пасының авторы атанды. Канадалық футболшы Кингсли Команды тауып, французға соққы жасауға мүмкіндік сыйлады. Коман есеп ашты. Бавария жартылай қорғаушысы футбол мектебін ПСЖ-да көрген. Сондықтан туған клубына қарсы ойында соққан голын бұл жолы тойламады. Бір қызығы, 2 жыл бұрын Коман ПСЖ қақпасынан саңылау тапқанда тойлаудан еш қысылмаған.
Кингсли кәрі құрлықтың басты доп додасында 50-ші матчын өткізді. Сол 50 ойынның 39-нда жеңіске жеткен. Жеңістер үлесі бойынша, Коман рекорд жасады. Құттықтаймыз. Бұл жолы қарсыласты қапы қалдыруы үшін оның бір ғана голы жеткілікті болды.