Семенланы Исмаил (Джырчы Сымайыл) - Анам

Мы в Instagram:
instagram.com/ezden_adet/
instagram.com/karachay_blog/
Мы в youtube:
kzhead.info/tools/iq_.html....
Мы в telegram: t.me/ezdenadet
Ата деген, Минги Таугьа миннгенлей,
Ана деген, дарий, дамха кийгенлей.
Кюнюм батды, джарлы анам ёлгенлей,
Джулдуз атлы, балдан татлы, ой, анам!
Билмегенлей, кёчюрюрге бардыла,
Сормагьанлай, машинагъа салдыла.
Эки джашынг эки джерде къалдыла,
Джулдуз атлы, балдан татлы, ой, анам!
Кимле чачдыла Семенлада къалангы?
Кимге айтайым джюрегимде джарамы?
Къайда къойдум акъ сют берген анамы?
Джулдуз атлы, балдан татлы, ой, анам!
Ой, Къарачай, къуш тюгюнлей, чачылды,
Бар палахны башы бери ачылды -
Джарлы миллет Азиягъа атылды,
Джулдуз атлы, балдан татлы, ой, анам!
Ата деген, ашхы ишге талпытхан,
Ана деген, кёкню, джерни танытхан.
Ёлюм деген, хар джюрекни ачытхан,
Джулдуз атлы, балдан татлы, ой, анам!
Ата деген, ёмюр юйню ачхычы,
Ана деген, джашауунгу басхычы,
Ёлюм деген, джашагьанны ачысы,
Джулдуз атлы, балдан татлы, ой, анам!
Ата деген, накьут-налмаз къалады,
Ана деген, джанынга джан салады,
Ол джашауну бир насыблы табады,
Джулдуз атлы, балдан татлы, ой, анам!
Тогъуз айны ау тюбюнде кёлтюрдюнг,
Къайын ата, къайын ана къолунда,
Кече-кюн да гёзет этген джолунда,
Джулдуз атлы, балдан татлы, ой, анам!
Эки джылны акъ сютюнгю ичирдинг,
Ёшюнюнгю тёшек этиб, ёсдюрдюнг,
Алай эте, талай джылгьа джетдирдинг,
Джулдуз атлы, балдан татлы, ой, анам!
Отха иймей, суугьа иймей сакъладынг,
Юй кёгюрчюн къанатларын джабханча,
Белляуунгда сени алгьыш сёзлеринг,
Джангкъылычдан нюр таякъла къакъгъанча.
Кёк памилден кёлек, кёнчек этгененг,
Къаназирден къаптал этиб кийдирдинг,
Эркелете, хар адамгъа сюйдюрдюнг,
Джулдуз атлы, балдан татлы, ой, анам!
Джети джылда окъуу-билим алдырдынг,
Ишлей-ишлей, санларынгы талдырдынг,
Джашачы, деб тоханала салдырдынг,
Джулдуз атлы, балдан татлы, ой, анам!
Таугьа чыкъсам, таш аджалдан, титиреб,
Малгьа кетсем, садакъала кёлтюрюб,
Бушуу, къайгьы джюрегинге келтириб,
Джулдуз атлы, балдан татлы, ой, анам!
Элден энчи ат атаенг атыма...
Джанауалда мен болмадым къатынгда...
Джаш тюрсюнюнг, агьармагьан чачынгда-
Джулдуз атлы, балдан татлы, ой, анам!
Къулагъыма сууукъ салах тартылды,
Джулдуз ананг ёлгенди деб айтылды,
Джюрегиме джюрек ауруу къатылды,
Джулдуз атлы, балдан татлы, ой, анам!
Къайда къалды харекетинг, малларынг?
Ишлей-ишлей талчыкъмагъан санларынг?
Джюнню джибек этген алтын къолларынг?
Джулдуз атлы, балдан татлы, ой анам!
Атам эсе, Бейтуллахда ёлюбдю,
Анам эсе, бир мусафир шейитди,
Нек джылайма, кимден да не келликди?
Джулдуз атлы, балдан татлы, ой, анам!
Джыллыкъ джолдан келир эдим кёрюрге,
Санга, анам, олджан салам берирге,
Разылыгьынгы алыб ёлюрге,
Джулдуз атлы, балдан татлы, ой, анам!
Къарачайда къабырынгы табсамед,
Зияратха Азиягъа бармазем.
Былай болуб къаллыгьымы мен билсем,
Джан бермейин, айырылыб къалмазем
Бу дуниягъа туумай къалгьан мен болсам,
Сени ёлген ачыуунгу билмезем,
Къазах элде къабырынгы кёрмезем,
Джулдуз атлы, балдан татлы, ой, анам!
Кёр узакъды, тура-тура безерсе,
Уллу Аллахны буйругьуна тёзерсе,
Машхар кюнде, ой, балам, деб излерсе,
Джулдуз атлы, балдан татлы, ой, анам!
Кюн садакъа мени санга беририм,
Аллах айтса, машхар кюндю кёрюрюм,
Къазах элде къалды, хариб, ёлюгюнг,
Джулдуз атлы, балдан татлы, ой, анам!
Кече ёмюрюм бир къарангы тёбеди,
Кюн ёмюрюм джюзюб кетген кемеди,
Ёлюм деген хар адамгьа тёреди,
Джулдуз атлы, балдан татлы, ой, анам!