Ырғыз ауданындағы кей ауылдар көшірілуі мүмкін.

Су басып қалған Ырғыз ауданындағы ауылдарда тұратын 400 дей адам эвакуация кезінде ұшаққа мінуден бас тартқан. Алғашқыда оларға бұл жерлердің су астында қалатынын түсіндіру оңай болған жоқ. Енді ауылдарды көшіруі мүмкін деген ақпаратты естіп, ырғыздықтардан да маза кеткенге ұқсайды. Ал, республикалық "Байтақ" жасылдар партиясының белсенділері бұл мәселені Парламент қарауына ұсынамыз деп отыр. Нұра ауылын әлі су басып тұр. Тәуіп пен Жайсаңбайдың да жағдайы жақсармай отыр. Ырғыз ауданындағы бұл ауылдарды алдағы жылдары қайтадан осылай топан су басуы мүмкін. Облыстық қоғамдық кеңес мүшелері де бұл ауылдарды басқа жерге көшірудің қамына кірісе беруді ұсынып отыр. Аудандағы жолды Қалыбайға қарай тартып, қырда тұрған Бөкенбай шатқалына да 200 отбасын қоныстандыруға болады. Қауіпсіз жерлер ауданда жеткілікті. Су тартылған соң жаз шыға бұл істі қолға алу керек дейді бүгінгі отырысқа жиналғандар. Бүгінгі басқосуда су апаты әлі де сейілмеген Ырғыз ауданындағы ауылдардың болашағы талқыланды. "Ауылымызды тасқын су зардаптарынан қалай құтқарамыз" деген атаумен өткен басқосуға кәсіби су мамандары да қатысып, өз пікірлерін білдірді.
Сайт телеканала www.rikatv.kz/
Twitter / rika_kz
Вконтакте vk.com/rikatv