Синоптиктер: Бұрқасын үш күн бойы сақталады

Қазақстанның бірқатар өңірінде ауа райы бұзылды.
Таңертеңнен бері дүлей дауыл соғып, ат құлағы көрінбейтін боранға айналды. Бұндай құбылыс Астанада да байқалады. Салдарынан астаналықтар жұмысына кешігіп, көшеде көлік кептелісі пайда болды. Қар тазалаушы техникалардың да ұшқындаған ақ ұлпамен күресуге қауқары жетер емес.
Астана ауа райы ерке мінезін көрсетті. Бұрқасын. Аяз. Желмен ірге жауған аппақ қар көз тұмшалап, аяқ бастырмайды. Бұл ретте қаладағы көлік қозғалысы баяулап, кептеліс туындады. Қаланы тазартуға тиісті техникалар еш нәтиже берер емес. Себебі қанша тазаласаң да, толассыз жауған қар тоқтар емес.
БЛИЦ:
- Кешелі бері синоптиктер еліміздің Жамбыл, Шығыс Қазақстан, Павлодар, Қарағанды, Ақмола және Солтүстік Қазақстан облыстарында ауа райы бұзылатынын ескертіп, дауылды хабарлама таратқан болатын. Бүгін елордада ат құлағы көрінбейтін боран соғып, жұртшылықты әбден әбігерге салды. Оңтүстік батыстан соққан желдің екпіні секундына 15-20 метрге дейін жетіп, қар ұшқындап тұр. Салдарынан жұмысына асыққан астаналықтар көлік кептелісіне де тап болуда. Ауа райының бұзылуына байланысты республикалық және де халықаралық маңызға ие тасжолдар жабылды.
Руслан Иманқұлов, ҚР ІІМ Төтенше жағдайлар комитетінің ресми өкілі:
- Астананың шеткі аудандарындағы елді мекендерге қатынайтын қоғамдық көліктер уақытша тоқтатылды. Яғни ауа райының асау мінезі басылмайынша, қаламен байланыс болмайды.
Бұған қоса Астанадағы мектептерде 1-2-ауысымдағы 1-11 сынып оқушылары мен колледжердің 1,2-курс студенттері сабақ оқымайды. Қазгидромет мамандарының айтуынша, атлантикалық циклон дүлей дауыл, ақ түтек боран мен көктайғақты алып келген. Синоптиктер мұндай ауа райы алдағы үш күн бойы сақталады деп болжап отыр.
Авторлары: Бірлік Берікұлы, Риат Шони, Бекболат Базаров