БОКСТАН ҰЛТТЫҚ ҚҰРАМА ЖІГІТТЕРІ ӘЛЕМ ЧЕМПИОНАТЫНА ТАС-ТҮЙІН ДАЙЫН

Қазіргі таңда бокстан Қазақстан ұлттық құрамасының мүшелері Түркістан облысы, Төлеби ауданында орналасқан «Алма-Тау» базасында әлем чемпионаты алдындағы қорытынды оқу-жаттығу жиынын өткізді.
Халықаралық деңгейде бой түзеген "Алматау" спорт базасында ұлттық құраманың боксшылары 6 мемлекет өкілдерінің қатысуымен біріккен жаттығу жұмыстарын жүргізді. Жиынға Армения, Аустралия, Тәжікстан, Филиппин, Грузин елдерінің құрамалары қатысты.
Бас бапкер Мырзағали Айтжанов әлем чемпионатына қатысатын боксшылардың жоғары деңгейде дайындықпен баратындығын жеткізді. Париж олимпиадасы қарсаңында биыл бірқатар лицензиялық турнирлер бар. Осы ретте қазақстандық боксшылар бұған дейін бағындырған белестерінен түспейді. Қазақстан бокс федерациясының басшылығы өз тарапынан бағыт-бағдар мен нұсқауларын жасады. Ташкентте өтетін әлем чемпионатына қатысатын былғары қолғап шеберлері 48 келідегі Санжар Тәшкенбай мен Токио олимпиадасының қола жүлдегері, жерлесіміз 51 келіде Сәкен Бибосынов бар. Бұдан өзге бокс мамандары шаршы алаңда жасындай жарқылдайтын 54 келідегі Махмұд Сабырхан мен 57 келіде сынға түсетін Серік Теміржановтан мол үміт күтеді. Сонымен қатар, жанкүйерлерімізді өз таланттарымен тәнті еткен 60 келіде жұдырықтасатын Талғат Сырымбетов пен 63,5 келіде Санатәлі Төлтаев кезекті әлем чемпионатында бақтарын сынайды. Бұдан бөлек 67 келідегі Дулат Бекбауов пен рингтің көркін қыздыратын 71 келідегі Азия чемпионы, команда капитаны Асыланбек Шымбергенов бар. Отандастарымыз әлемнің үздік боксшылары бас қосатын жиыннан жүлдесіз қайтпаймыз дейді ұлттық құраманың ұланы Асыланбек.
Бокстың - жазылмаған өз заңы бар. Әлем чемпионатына санаулы күндер қалды. Қазақстан Республикасының еңбек сіңірген жаттықтырушысы Мырзағали Айтжанов бірқатар олимпиада ойындарына еліміздің құрама жігіттерін бастап барып, Лондон және Рио олимпиада ойындарында ғаламат жетістіктерге жеткенін қазақ елі жақсы біледі. Ташкентте жалауы желберейтін кезекті әлем чемпионатына осал боксшы қатыспайды. Бұл ретте, бапкерлеріміз бұдан басқа 75 келідегі Нұрқанат Райыс пен 80 келі салмақта өнер көрсететін Нұрбек Оралбайға, 86 келіде атой салатын Сағындық Тоғамбай мен 92 келідегі Айбек Оралбай +92 келіден жоғары салмақта бақ сынайтын Қамшыбек Қонқабаевқа мол сенім артуда. Бас бапкер Мырзағали Құланұлы бәсеке бар жерде расында да жетістік бар екендігін айтады. Ал, Түркістан облысының даңқты боксшысы Токио олимпиадасының қола жүлдегері жерлесіміз Сәкен Бибосынов елдің үмітін ақтау үшін бар күш-жігерін ортаға салатынын айтты. Бұған дейін бокстан әлем чемпионаты Сербияның Белград қаласында өткен болатын. Әлемнің азулы боксшылары бас қосқан додада Сәкен Бибосынов алтын, Махмұд Сабырхан мен Серік Теміржанов күміс жүлдегер атанды. Дүниежүзілік додаларда қарсыластарын тізе бүктіретін дарынды былғары қолғап шебері Сабырхан Махмұд та әрдайым ұлттық намыс бәрінен де жоғары екендігін жеткізіп, жүлде үшін таласатындығын айта өтті.
Токио олимпиада ойындарында шаршы алаңда тамаша өнер көрсеткен Қамшыбек Қонқабаев та-еліміздің мақтанышы. Төртжылдық додаға қатысқан тәжірибелі боксшы Қамшыбек жыл сайын шыңдалып, көп нәрсе түйгенін жеткізді.
Республикамызда бокстың әлемдік деңгейде дамуына мол үлесін қосып келе жатқан Қазақстан Республикасының бокс федерациясының атқарушы директоры Марат Мықтыбеков әрбір саңлақтың жоғары деңгейде жаттығу жасап, нағыз бабында болуларына ықпал етуде.
Тәуелсіз еліміздің мерейін үстем етіп, Көк байрағымызды желбіретіп келе жатқан болашағы жарқын боксшыларымыз арасында Санжар Тәшкенбай, Нұрқанат Райс бар. Олар да әлем чемпионатында намыс үшін бар жігерлерін көрсетіп, батыр елдің ұрпақтары екендіктерін көрсетпек.
19-29 сәуір аралығында Түркістан облысы, Алма-ТАУ спорттық базасында өткен ұлттық құрама жаттығуы жоғары дәрежеде өтті. Алда әлем чемпионаты. Осы әлемдік доданың алдында спорт ардагерлері келіп, жігіттерге ақ баталарын берді. Осы ретте Түркістан облысының бокс федерациясының президенті Сұлтан Кушенов шетелдік боксшылар мен бапкерлерге шапан жауып, қазақ елінің қонақжайлылығын білдірді.
Бокстан әлем чемпионаты Ташкентте 1-14 мамыр аралығында өтеді. Ұйымдастырушылар біріншілікке 104 елден 600-ден аса былғары қолғап шебері қатысады деп отыр. Жеңімпаздар мен жүлдегерлер 13 салмақ дәрежесі бойынша анықталады. Халықаралық бокс қауымдастығы (IBA) алтын медаль иегеріне 200 000 АҚШ долларын, екінші орын алған боксшыға 100 000 және екі қола жүлдегерге 50 000 АҚШ долларынан береді деп жоспарлануда.
Ендеше еліміздің жігіттеріне сәттілік!