Үш адамды өрттен құтқарып, өзі ажал құшқан Асқар Забикулиннің денесі жер қойнына тапсырылды

Бүгін өрт сөндіруші Асқар Забикулиннің денесі жер қойнына тапсырылды. Марқұмның жаназасы Көкшетау қаласының орталық мешітінде оқылды. Туған-туыстары Асқарды өзінің туған жері Біржан сал ауданындағы Үлгі ауылында жерледі. Марқұммен қоштасуға көп адам келді. Сондай-ақ, ел бойынша төтенше жағдайлар министрлігінің аумақтық бөлімшелерінде бүгін Асқарды бір минуттық үнсіздікпен еске алды. Айта кетейік, Астанада өртке оранған пәтерден үш адамды құтқарған Асқар Забикулиннің денесінің сексен пайызын күйік шалып, жансақтау бөліміне түскен болатын. Дәрігерлер азаматтың өмірін аман алып қалу үшін барлық жағдайды жасағанымен өрт сөндіруші ауруханада көз жұмды.
Жанып жатқан үйден үш адамды аман алып шыққан Асқар Забикулинді бүгін туыс-туған, дос-жарандары ақтық сапарға шығарып салды. Марқұммен қоштасуға келгендер қарасы өте көп. Бір ғана Астана горнизонынан жүз елуге жуық әріптесі барған. Одан бөлек, тура сағат12.00-де республика бойынша төтенше жағдайлар министрлігінің аумақтық бөлімшелерінде Асқарды бір минуттық үнсіздікпен еске алды. Марқұмның денесі Ақмола облысындағы туған ауылы Үлгіге қойылды. Бүгінде халықтың батырына айналған өрт сөндірушінің артында етегі жасқа толған анасы мен жары, әкелерін күткен екі баласы қалды. Ауылдастары Асқарды батыл, айтқанынан қайтпайтын, әділ азамат еді дейді. Ол мектеп жасынан-ақ өрт сөндіруші болуы армандаған екен. Спортпен де шұғылданған. Үлкенге де, кішіге де үлгі болып қалды дейді Үлгіліктер.
БАҚЫТГҮЛ МАНАШЕВА, Марқұм А.Забикулиннің ұстазы:
- Әжесінің баласы деп айтатынбыз. Ерке болды. Бірақ еркеліктің орны болды онда. Мінекей сондай бала бүгінгі күні батыр деп жатырмыз. Сол батырлығымен өзінен кейінгі үлкенге де кішіге де үлгі болып, елдің есінде қалып отыр. Біз оны ұмытпаймыз. Мәңгілік жүрегімізде!
ДАРХАН ҚАСЫМОВ, Марқұм А.Забикулиннің әріптесі:
- Мен Асқармен 5 жыл бір бөлімде жұмыс істедім. Біз барлық жерде бірге болдық. Үнемі бір-бірімізді қолдап жүрдік. Осы жолы мен оның жанында болған жоқпын. Шынымды айтсам, өте қатты өкінемін. Неге мен жанында болмадым екен? Мүмкін бәрі басқаша болар ма еді?
ЕРДОС ЖЫЛҚАЙДАР, Марқұм А.Забикулиннің курстасы:
- Асқар бауырымыз өзінің өмірін қатерге тігіп, басқа жанның өмірін аман сақтап қалып бұл енді үлкен мәртебе өрт сөндіруші үшін. Бұл біздің басты міндетіміз.
Ал Асқар құтқарып қалған отбасы мүшелері қазір пәтерлерін жөндеуге кіріскен. Света Нұртазинаның айтуынша күйеуі екеуі сол күні жұмыста болған. Ал, өрт құрсауында қалған баспанада сексендегі енесі мен жиырма екі жастағы қызы болыпты.
Үйді қара түтін баса бастағанда олар пәтерден шығып үлгермеген. Өйткені, балқып кеткен сыртқы есікті іштен аша алмағай қалған. Бірден әкесіне хабарласқан Аружан мән-жайды түсіндіріп үлгерген. Ата-анасы келгенше әжесімен ас үйдің терезесінен көшедегі кісілерден көмек сұраған. Ал, Асқар оларды құтқару үшін он екінші қабаттан арқанмен түсіп, пәтерге терезе арқылы кірген. Немересі мен әжесін арқалап шыққан өрт сөндіруші көрші пәтердегі өрттен қорқып тығылған баланы да құтқарып қалған. Тек өзін құтқара алмады. Асқардың денесінің сексен пайызын күйік шалып, жансақтау бөліміне жатқызылды. Дәрігерлер оны аман алып қалу үшін бірнеше тәулік бойы ем жүргізген. Света Нұртазина соңына дейін Асқардың амандығын тіледім дейді. Тіпті пәтерінде өртенбей қалған Құран кітапты ауруханадағы Асқарға апарып, басына қойып қоюуын сұраған.
СВЕТА НҰРТАЗИНА, пәтер иесі:
- Асқарға айтарым, жатқан жерің жайлы жаным, жаным дейсің ғой енді біреудің баласы. Жатқан жері жайлы болсын, топырағы торқа болсын. Жас қой, жас кетті әрине. Жас кетті. + 04:18 Мен басымды иемін ол балаға. Алып шыққанына мың да бір рақмет.
Асқардың батырлығы мен қысылтаяң сәттегі жанқиярлық әрекеті халықтың жүрегінде сақталады деді Мемлекет басшысы Қасым-Жомарт Тоқаев. Президент Астанадағы көшелердің біріне Асқар Забикулиннің есімін беріп, бюст орнатуды тапсырды. Алайда бұл құрмет марқұмның артында қалған анасы мен жарының, екі баласының жүрегіне салған жараны емдемесі анық.
Бізді әлеуметтік желіде оқыңыздар:
KZhead - / @informburo31kanal
Facebook - / informburo31
Instagram - / informburo31
Vkontakte - vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал