«Махаббатым жүрегімде» телехикаясының жалғасы түсірілуде

Көрермен ықыласына бөленген «Махаббатым жүрегімде» телесериалының 2-маусымы түсіріліп жатыр.
Жоба продюсерлерінің айтуынша, екі жас арасындағы тұнық сезімге құрылған оқиға желісі тосын жайттар және күтпеген оқиғалармен өрілмек.
Телехикаядағы оқиғаның шиеленісі бірін-бірі сүйген екі ғашықтың түрлі әлеуметтік ортадан шығуынан басталады. Бас кейіпкер Дастан Кембридж университетін бітіріп келген ауқатты отбасының баласы, ал Кәмшат қарапайым ауылдың қызы. Дастанның ата-анасы Англияда оқып келген ұлына Кәмшатты лайық деп есептемейді. Дегенмен телехикаяның жаңа маусымы көрермен үшін күтпеген жаңалықтарға толы болмақ.
Баян Есентаева, жоба продюсері
-Халық күнделікті өз өмірінде кездесіп жатқан, кез келгенімізде орын алуы мүмкін өте қарапайым хикаяны қарағысы келеді. Сондықтан телесериалдағы оқиға желісі барлығымызға қатысты дер едім.
Телехикаяның жалғасын түсіру тізгінін бұл жолы жас режиссер Ернар Нұрғалиев қолға алыпты. Бұған дейін ол түрлі жарнамалар мен бейнеклиптерді түсірген. Сондай-ақ актерлардың біразы ауысқан.
Фильмнің алғашқы маусымында басты кейіпкер Марленді ойнаған Дастен Шакировты «Орда» тобының мүшесі, актер Дастан Оразбеков алмастырды.
Әділжан Шомбалов, актер
-Бұл сериалдан ұға түсінетініміз бір ғана нәрсе - өмірде болып жатқан жайттар, ақшаға қызығып бір-біріне бас қосу, ақшаға құнығып, отбасының арасына кіру, ары қарай өзінің ойлағанын іске асыру. Бұл дегенің өмірде бар жайт.
Телехикаядағы басты кейіпкердің бірін танымал әнші
Turkvisyon-2014 ән байқауында Қазақстан намысын қорғап, жеңіске жеткен Жанар Дұғалова ойнайды.
Жастар өмірін суреттейтін астарлы ойға толы телехикаяның жалғасын көрермендер «Хабардың» жаңа маусымында, қыркүйекте тамашалай алады.
Авторлары: Майра Ілес, Айдар Әбдешев, Ерлан Абжанов