Әскерге кетіп жұмбақ жағдайда көз жұмған 18 жастағы жігіттің туыстары әділдік іздейді

Әскерге кетіп төрт күннен кейін туған жеріне табытпен оралған маңғыстаулық Әлібек Қалбайдың туыстары әділдік сұрайды. Олар сарбазды жерлегеннен кейін эсгумация жасап, экспертизаға бергенде марқұмның 18 жерінде гематома бар екені анықталғанын айтады. Сондықтан жас жігіттің өліміне бір ғана адам кінәлі дегенге сенбейді. Осы уақытқа дейін өткен 24 сот отырысына 127 куә тартылды дейді туыстары. Сарбаздың өліміне дейін әскери бөлімдегі 220 камераның бір де біреуі жұмыс істемейтінін әскерилер білмеген деп отыр.
Әлібек Қалбайды өзімен қатарлас сарбаз ұрып өлтірді дегенге сенбейміз дейді туыстары. Олар 18 жастағы жігітті жерлеген соң, эсгумация жасап, тәуелсіз сараптамаға берген. Экспертиза нәтижесінде Әлібек Қалбайдың денесінде 18 жерде гематома бар екені анықталған Одан бөлек жас сарбазды әскери бөлімде «Айжамал» деп атап мазақ еткен дейді туыстары.
БОЛДЫҚ ҚҰЛМАҒАМБЕТОВА, Әлібек Қалбайдың әжесі:
- Балама 18 жерінен жарақат салған, гематома салған. 18 жеріне жарақатты бір бала салды дегенге мен сенбеймін. Себебі сержанттардың да, командирлердің де қатысы бар екеніне менің көзім жетіп тұр. Менің балапанымды кім ұрып кім не қылған болса, әділдік шығарсын. Мен сол әділдікке жетпей қоймаймын. Балапаным... соншама қинайтындай не керек болды ол балапанымнан?
ДИНАРА ТІЛЕСОВА, Әлібек Қалбайдың жеңгесі:
- 18 апрельден бастап телесный осмотр журналында бала вообще тіркелмеген болып шықты. Айжамал деп марқұм қайнымды мазақ қылған ба офицер, сержант Дайрабаев айтты деп бізге айтты ғой енді Аманжолов Айболаттың ата-анасы. Сол кезде детеклорлық лжи 50-де 50 растап шығарып берді Айжамал деп айтқанын баланы солай мазақ етіп, келекеттегенін. Соның барлығы сот отырысында қараусыз қалып, яғни дәл қазір куә жоқ оған деп.
Әскерилер туыстарына алғашында Әлібек сапта тұрған кезде есінен танып құлады десе, кейін өзінің қатарласы соққыға алған деп хабарлаған. Осы уақытқа дейін болған 24 сот отырысында біздің бір де бір дәлел-айғағымызды сот назарға алмады деп шағымданады туыстары. Ал бас әскери прокуратура өкілдерінің айтуынша сот істі қайта қарау үшін прокуратураға қайтарған.
КЕМЕЛ ШАЯХМЕТ, Бас әскери прокуратураның басқарма бастығы:
- Алматы гарнизоны әскери сотының қаулысымен курсант Қалбайдың өліміне қатысты қозғалған өндірісі қылмыстық іс жүргізу кодексінің 323-бабының талаптарына сай прокурорға кері қайтарылған. Сот шешімі жәбірленуші анықталмаған басқа тұлға тарапынан соққыға түсуі мүмкін деген тұжырыммен негізделген. Аталған қаулыдағы көрсетілген дәйектермен келіспей, мемлекеттік айыптаушының тарапынан аппеляциялық сот алқасына өтініш енгізілген.
Сонымен қатар, дәлелдерге сот процесінен тыс баға беру мүмкін емес дейді прокурорлар. Қылмыстық іс аппеляциялық сот сатысында ертең, яғни 9 қараша күні қаралмақ. Әскери прокуратура өкілдері барлық дәлел аппеляциялық сот отырысында толық анықталатынын айтып отыр. Айта кетейік, Әлібек Қалбай сәуір айында Отардағы № 30/212 әскери бөліміне Отан алдындағы борышын өтеуге барып, жауынгерлік антты қабылдамай жатып қайтыс болған еді.
Бізді әлеуметтік желіде оқыңыздар:
KZhead - / @informburo31kanal
Facebook - / informburo31
Instagram - / informburo31
Vkontakte - vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31
#СарбазӨлімі #ҚарулыКүштер #Әлімжеттік