Қызылорда облысында еріген қар суының астында қалған ауыл тұрғындарына қайық қажет

Қызылорда облысында еріген қар суының астында қалған бүтіндей бір ауыл тұрғындарына қайық қажет. Өзенге айналған ағын суда резеңке етіктің де көмегі болмай қалған соң, көпшіліктің сұрауы осы. Жаңақорған ауданына қарасты Жайылма ауылының тұрғындары қолдарына күрек алып, қапқа құм салып, бөгет жасап әлек. Ал төрт күннен бері келмеген құтқарушылар, төтенше жағдайға төтеп беруге талпынып жүр.
Қызылорда облысының халқы қызыл судың астында қалды. Аязды күн райы қайтып, жылы ауа келген сайын, еріп аққан қар суы бүтіндей бір Жайылма ауылын басып қалған. Үш жүз үй мен қора-қопсық таудан келген тасқын суға малынып, бүкіл ауыл тайлы-тұяғымен қолдарына күрек алып, баспанаға кіріп кетпесін деп бөгет қойып жүр. Шамалары жеткенше қапқа салынған құмды тастап, тасқын судың алдын алған болып жатыр.
Жылда көктем шығар уақытта қыс бойы жауған қалың қардың еріп, ауылға қарай ағылатынын бәрі біледі дейді азаматтар. Оның үстіне елдімекенде арық болмағандықтан, апаттың қауіптілігі артады айтуларынша. Бірақ суды тоқтату шаралары құтқарушылар тарапынан жасалмайтындықтан, жайылымдықтар төтенше жағдайдан өз беттерінше шығуға дағдыланып қалған. Сол дәстүрге үйренсе керек, әкімдіктің де бір өкілі төрт күн бойы бір бас сұғып келмепті айтуларынша.
Облыстан көмек тек халық шақыртқан соң келген. Билік өкілдері он жеті көлік келіп, су сорып жатыр дегенімен, көзге түскен үшеуі ғана қызыл судың астында қалған ауылға көмек көрсеткенге ұқсайды. Су алатын құдықтары лай суға толып қалған халық, ауыз судан қағылыпты.
Үйлерінен шыға алмай қалған үлкендер жағы жұмыстан қалса, кішкентайлар бірнеше күннен бері сабаққа бармаған.
Әкім жоқ емес, бар. Нақтырақ әкімнің орынбасары осында. Ақиқатты айтқан басшы, азаматтарға дауыс көтеріп ұрсып қояды. Шындық жанына батпаған сыңайлы. Аяқтарына резеңке етік киіп, лай сумен алысқан ауылдықтардың қасында, қара туфли киген шенеунікті табу да қиын емес.
Үкіметтен бір бір қайық сұрап отырған көпшіліктің бар өтініші апатты алдын алуға тиісті органдар дағдыланса дейді. Өйткені жылда қызыл судың астында қалатын Жайылма ауылы тұрғындарының бүгінде үйлері мен қоралары құлаудың аз-ақ алдында қалған.